هاموت م الجوع
هاموت م الجوع ..كلمه قديمه تسمعها في كام موضوع
اللي من الدايت هفتان ..واللي من الصيام موجوع
ف مره تقول فلان دا جعان ..ومره تقول عليه مفجوع
لكنك لما تسمعها ..من اللي في الحصار مزورع
وف البرد الشديد قاعد ..لاحس ولا خبر مسموع
وبيكمل وبيعافر
لا عنده اوبشن استقرار ولا هيسيبها ويسافر
وايد علي الخد عين علي الجار ..وكرب شديد وجوع كافر
ساعتها الجوع هيبقا السب فيه مشروع ..لاحد يقولي عيب يا ابني
لان ابني ياعمي جعان
وصورته في الطابور عندك مع الحله وبالألوان
ومتقوليش وانا اعمل ايه ..؟!
روح اعمل اللي يحلالك
وده ابنك ..وده دارك ..ودي ارضك ..ودا مالك
وانا مش هفتح الموضوع.. ياإما الامه دي تصحي ويبقالها كلام مسموع
ياإما هموت أنا وابني قصاد عينك هنا م الجوع شعررؤوف علواني